Zomite' Kota Damansara ah:
Malaysia gam a om Zomite a tamzaw ansai nasep ahih manin haksatna tuamtuam hang tawh mun khat ah kip den cih om khol lo hi. Mun khat ah atawp ciangin a dang mun khat ah dawpin a lemna munmun ah sem uh hi. Tua ahih manin Kota Damansara sungah Zomi 200 val bang (2009 kum) a om theihna dingin 2006 kum in a na tung masa Tg Pau Suan Khai (Thangnuai) leh Pa Nuam Za Kap (Suangpi) te ahi uh hi. 2006 April kha sung in Pa Pautawng (Suangpi), Pa En Za Mung (Suangpi), Pa Pau Tung (Thangnuai) leh Pa Thawng Khan Suan (Leipi) nasep zongin na pai leuleu uh hi. A mau lunggulh bangin nasep ding om ahih manin Pa Pautawng in inn bup khat nasaap a tua hun akipan Zomite' nasep zong peuh mah in belh theih ding zin tun na khat hong suak hi. Tua hun akipan tatsatlo in a hunhun in Zomite tu ni dong hong tung ahi hi.
Zomi Christian Fellowship biakpiakna ding a pian khiatna thu:
Malaysia gam sung mun tuamtuam ah Zomite' makaihna tawh biak piakna a om mah bangin ZCF Kota Damansara zong mun khat ahi hi. Zomite' kikhop theihna dingin lunggulhna lianpi a om khit tak ciangin thungetna leh hanciamna tuamtuam tawh anuai a bangin ZCF hong piang khia hi. 2008 August 14 ni-in Pa Gin Khan Thang (Singunau) leh Tg Nang Khen Mang (Zosuan) te in Sanctuary Praise International Church Apostle Benjamin Okorie leh a zi Mona Lee te nupa tawh a biakinn uh zat theihna ding thu pulaakna na nei uh hi. 2008 August 20 ni-in hih tawh kisai vai khempeuh a lemzawkna ding lunggulhna tawh ZCF-Canaan pan in Rev. Lian Za Huam leh Upa Thang Than Tuang te na sam uh a siate nupa tawh holimna a neih khit uh ciang in Zomite' kikhopna ding mun a lem hong suak hi. 2008 August 24 (sunday) ni-in a masa pen kikhopna na nei thei uh hi. Kikhop cil ni hun khempeuh a makaih dingin Rev.Suan Khan Do (ZCF-Kajang) pan vapai a honna, apna leh hanthotna thupi tak va nei thei hi. Tua ni-in inntek pawlpite pawlkhat tawh kikhawm khempeuh 27 pha uh hi.
